Indane Gas Booking Down: వంటగది నుంచి గ్యాస్ సిలిండర్ బుక్ చేయాలని ప్లాన్ చేస్తున్నారా? అయితే ఇప్పుడు ఒక ముఖ్యమైన వార్త వినండి. దేశవ్యాప్తంగా ఇండేన్ గ్యాస్ బుకింగ్ వ్యవస్థ పూర్తిగా స్తంభించిపోయింది.
యుద్ధం, కొరత అనే భయాలు వ్యాప్తం కావడంతో లక్షల మంది ఒకేసారి ఫోన్లకు పని చెప్పారు. సాధారణం కంటే 8 నుంచి 10 రెట్లు ఎక్కువ కాల్స్ వచ్చాయి. దీంతో IVRS మరియు మిస్డ్ కాల్ సిస్టమ్ కుప్పకూలాయి.
ఇండేన్ సంస్థ డీలర్లకు పంపిన అంతర్గత సందేశంలో ఈ పరిస్థితిని అసాధారణం అని స్పష్టం చేసింది. 15 కోట్ల వంటగదులకు సేవలు అందించే నెట్వర్క్ ఇలా ఒత్తిడికి గురైంది. ప్రభుత్వం బుకింగ్ గ్యాప్ను 25 రోజులు చేసినా ప్రజలు ముందస్తుగా ప్రయత్నించడం వల్ల సమస్య తీవ్రమైంది.
బెంగళూరు డిస్ట్రిబ్యూటర్ ఒకరు తన ఆవేదన వ్యక్తం చేశారు. సరఫరా 50 శాతం తగ్గగా డిమాండ్ మాత్రం పెరిగిందని చెప్పారు. రామమూర్తి నగర్ నుంచి వచ్చిన ఒక కస్టమర్ “గతంలో రెండు రోజుల్లో వచ్చేది, ఇప్పుడు వారం గడిచినా ఆచూకీ లేదు” అని వాపోయారు.
ఈ భారీ ట్రాఫిక్తో ఏజెన్సీల వద్ద యుద్ధ వాతావరణం నెలకొంది. గంటల తరబడి ఫోన్ చేసినా ఫలితం లేకపోవడంతో ప్రజలు నేరుగా గోడౌన్లకు చేరుకుంటున్నారు.
ఇండేన్ సంస్థ త్వరగా చర్యలు చేపట్టింది. IVRS ఆడియో సూచనల సమయాన్ని తగ్గించి బుకింగ్ వేగవంతం చేస్తోంది. అయితే ప్రజలు వాట్సాప్ బుకింగ్, ఇండియన్ ఆయిల్ వన్ యాప్, కస్టమర్ పోర్టల్ లేదా అమెజాన్ పే, ఫోన్ పే, పేటీఎం వంటి డిజిటల్ మార్గాలు వాడాలని సూచించింది.
సాయంత్రం 6 గంటల తర్వాత లేదా రాత్రి 10 నుంచి ఉదయం 6 మధ్య బుకింగ్ ప్రయత్నాలు చేయండి. ఈ కాలంలో వచ్చిన అభ్యర్థనలు మరుసటి రోజు ప్రాసెస్ అవుతాయి. కొరత వార్తలు నమ్మి ఆందోళన చెందకండి. డిజిటల్ ఎంపికలు ఉపయోగిస్తే సులభంగా సిలిండర్ బుక్ చేసుకోవచ్చని అధికారులు భరోసా ఇస్తున్నారు.
